曾幾何時，周慧敏與倪震被喻為圈中金童玉女，一個有樣、一個有才華，堪稱絕配，雖然期間倪震曾經孔雀開屏，同做得佢個女嘅张茆驚爆出軌風波，仲搞到要引咎分手，不過最終都雨過天青，倪震同周慧敏喺2009年結婚，之後才子開始修心養性，絕少再傳出桃花緋聞，唔再做無腳雀仔！
光陰似箭，話咁快佢哋結婚差唔多10年，下個月周慧敏就滿51歲，不過貴為玉女掌門人嘅佢直頭好似食咗防腐劑，最近Vivian頻頻出席公開活動，喺高清鏡頭下，唔止未見老態，仲依然係咁靚，更加有唔少網民大讚佢索過好多8、90後嘅女星，絕對係永遠嘅玉女掌門人。本來有個靚老婆係開心事，弊在私有化咗Vivian嘅倪震，從來都係唔少人嘅公敵，有網民就好有心咁人肉搜查倪震嘅近照，雖然佢只係大Vivian三年，今年50有4，但一段時間無公開露面嘅佢竟然嚴重走樣，老態畢現，有網民擔心佢係咪有病：「無見一排，點解當年迷倒李嘉欣、陳法蓉嘅風流才子，老到好似有病咁嘅？」仲有人話Vivian好似無端多咗個叔叔：「Vivian睇落似3字頭，倪生就似6張，兩個行埋唔似兩公婆，似叔姪多啲囉！」睇嚟倪才子真係要好好keep吓先得喇！