傭人放大假！黃伊汶樂做全職媽媽

藝人黃伊汶（Emme）以低胸露背裝出席活動，她表示因為要支持手錶業才赴會，坦言現時是零售業的困難時期，大家都要找尋新方向，不少人傾向網上發展，她亦會參考，Emme說：「我都有搞網店，做實體店係辛苦，但都係有需要，我啱啱喺內地返嚟，我地內地第三間店開張，呢間喺汕頭，深圳同鄭州都有。一步一步嚟，希望每個省都有分店。（你嘅目標係開幾多間？）希望每個省都有，盡力啦！開到20至30間都好開心，如果有加盟商合作開嘅話就唔困難。（會上巿？）呢步唔諗住，品牌會畀個方向自己，首先推去唔同地方先。今次開店係同嗰個地區嘅代理合作，都投資咗七位數字。（品牌做咗咁多年係咪有錢賺？）有！但做生意唔係永遠都係賺，而且賺咗都要投資番去個品牌度。」

另外，提到囝囝，Emme笑言湊仔比做品牌更辛苦，她說：「因為湊開囝囝嘅工人姐姐放十日大假，返咗菲律賓，我要做番全職媽咪，除咗開會之外，我都唔會返公司，以往厭惡性嘅工作都係由工人姐姐做，依家冇得揀，每日都要湊佢，我覺得自己同囝囝嘅感情深厚咗，呢個感覺都幾正，由之前唔想工人姐姐走，到依家唔係咁想佢返嚟，我覺得以前畀囝囝嘅時間唔夠多。」Emme稱現時兒子一歲兩個月，已會在家中四圍走，笑指囝囝四肢發達，頭腦簡單。

-----------------------------------

東網已全面支援360影片及相片，讓你全方位睇盡新聞大事，恍如置身現場，立即登入東網360網頁： http://on.cc/360/

如仍未更新東網App，請按此連結收睇360影片： https://goo.gl/OoBVrB