好多啱啱入行嘅新人，都會被問到預計要花幾多時間俾自己喺娛樂圈熬出頭，不過每次答完，過咗若干年之後，大家都會發覺當事人會再update話覺得自己仲可以試多啲嘢！結果就好似《無間道》入面嘅梁朝偉咁，出現3年又3年嘅情況！喺啱啱播完咗嘅《搜下留情》入面同羅仲謙（Him）做一Pair嘅黃智雯（Mandy），07年參選完港姐之後入咗訓練班，之後即刻被安排演出劇集，然後極速喺《巴不得爸爸》同「搜」劇入而分別做胡杏兒同陳慧珊細妹，條路明顯叫行得比其他人快。不過，今年啱啱好入行第3年嘅Mandy，發現原來行得比其他人快都好，3年時間都係眨眼就過！而家，先至係佢嘅起步點。

3年又3年

喺演藝學院畢業嘅Mandy，最初入行幫自己訂立3年大計，點知做做吓先發現，原來3年只不過夠自己行出第1步，Mandy：「原來時間過得好快，最初同自己講，想用3年時間令自己有知名度，然後再去做舞台劇，咁樣就可以吸引多啲觀眾去欣賞，點知而家已經兩年幾，要入屋真係唔容易！而家出街有人會叫自己喺劇入面嘅名，已經覺得好開心！慢慢我就發覺，形象嘅嘢真係唔急得，要慢慢build up！」其實Mandy已經比同期出道藝人幸運，起碼有人記得佢係鵪鶉妹先吖！

蘊藏的野心

人馬座嘅Mandy，已經3度喺劇集飾演細妹嘅角色（註：第3套係同林峯合作嘅《不速之約》），Mandy話自己其實同劇入面嘅角色完全相反，3度俾人揀中做「妹」，可能係導演貪佢夠極端！Mandy：「我本身性格好慢熱，唔出聲嗰陣俾人感覺好靜好斯文咁，加上我喺訓練班嘅Presentation嗰度表演咗一個扮小朋友嘅舞台劇，可能咁樣俾啲導演覺得我適合演啲弱質纖纖嘅角色，其實我活躍起上嚟都可以好癲！心態上其實我好想打破人哋覺得我好斯文嘅感覺，或者係自己嘅底層蘊藏住好狂野嘅心態（註：呢句原汁原味照出的！），我覺得自己好適合做喜劇，或者做打女！」對自己有要求係好事，不過又唔使咁急轉型嘅，觀眾都未認清你係邊個就轉第2個形象嘅話，反而唔係好事！

意外的巧合？

第1次合作飾演情侶嘅Mandy同Him，劇集播到一半嗰陣，忽然有報導話佢哋戲假情真，當事人當然例牌否認，話對方只係好好朋友。事實上，Mandy同Him有太多共通點，巧合到令人難以置信！Mandy：「我好祟拜吳鎮宇同方中信，覺得佢哋好Man！又好想同張可頤或者司琪姐合作，因為佢咃真係好成功，好值得學習！阿Him？佢幾好吖，表面睇佢好似好後生仔，但熟咗先發現原來佢好成熟，又鍾意聽舊歌！（符合你嘅擇偶條件嗎？）我鍾意啲體貼、細心同運動型嘅男仔！我寧願佢肥都唔可以瘦，因為會有多啲安全感，有咩事都可以奮勇救自己嗰種！」

如果大家記性好嘅話，應該記得阿Him講過自己同啲前輩級嘅人特別投緣，而且佢仲係唔做運動唔安樂嘅人，加上為咗拳擊高手嘅角色狂操之後得返嚟嘅結實身型，咪完全符合哂Mandy嘅要求囉！呢個世界有冇咁啱得咁橋呢!?