BELESEN MELENGKAN ATAU KEKETARAN

CERAK EDET MUNERIME NI REMPELE

VERSI GAYO DERET LINGE ASAL

Assalamualaikum wr.wb

Ama Reje, Reje kampung, … selaku daling kolak seserente, kayu rubu pelongohon beserta sarak opat si
timang beret panang melie, maupun ama saudere sialang tulung beret berbantu siikut patut si layak laku
sikami hormati.

P3N pencatat nikah sikami pemeliei, Ama Reje kampung.... kecamatan . . . . . Ama-ama, ine-ine para
petueni kami siwajib kin penetah siperlu kin penentu ton kami teduh tempat menye ni kami si kami
pemeliei,urum-urum kite munyawah ni puji syukur ku Allah swt simunosah rahmat den karunia kukite
berupe nikmat sehat,maupun kelapangan hingge kite depet mumungen janyi-berjanyi ibatang ruang
simutete gergel,kemudin kemuduk dari pede oya, gere luput urum lupe selawat urum salam kite
sawahan kunabi muhammad saw,singe berjuang munangkat mertebet umet manusie ari arul si hine ku
pematang si mulie hinge depet kite bersatu demi menegakkan syariat islam itanoh gayoni ,Amin
yarabbal alamin.

Ama reje kutatangan se jejariku si sepuluh ampun kite tiroi orom-orom ku allah swt. ma’af kutuah
bahgie kerna kamini male munyawah ni keber singket berite selalu urum cerak kire sara patah beserta
peri sara kalimah dalam beta die, kadang kase si patut ter mulo udah ngeter puren, si patut ku kiri
kadang ngeku kuen,begi nipantas kadang kase lepas, lemem kadang kase taring maklum seje kite
manusie biasa kene peri jemen semantung merawe silep semerlep arawe lale.

Kin Pantase kase, kuharap ku ama reje gelah tir munulo, lememe kase taring ,kuharap ku ama reje atawa
ariama-ama serta ine-ine,siara wan batang ruangni kase gelah tir murai, maklum le delah si gere
bertulen bibir si gere berdeku ipon si gere ber belide,begini anak kalah sigere musudere
berkemungkinen kadang kase cerak sisara patah peri sara kalimah, kurang kase tutur katae, titik urum
komae besilo kutatangan jejari sepuluh sebelas urum akal kekire,muniroi ma’af kuama reje.

Ama reje, rejeng ku reje. Atas di nge baur si kami tangkoki relem di nge arul si kami kilihi kemana urum
berkat doa ni ama reje, kami ari kampung. . . Nge le sawah,gere le sesanah urum muhali
seli,berkebetulen gere ara gajah mulintang idene belide perentang lelawah peregang, alhamdulillah
ngesawah, kami kuuluni kite sipitu tenge kuruang sipitu ruang, ngekuatan tete si rempak susun ne atas
jerih payah teredep tetah tentu nibuet, ariama reje beserta sudere-sudere nikami isien singe mungunul
nikami kuatan tete urum lemos tarahe singe mulongoh nikami kuwan umah bersupu si rapat semate,ini
sigere depet terbeles, maka kami serahan ku tuhen allah swt.

Kerna kami sigehni beriringen kire naru bertenamunen kire kaul tentu roa turun-ne sara turun ni kaum
Edem sarami turun-ni kaum siti hawa,nge barang tentu tulu curak regem perangewe.Ara sitetue
simunemah tahluk iden-ne urum rigeni tubuhe,ara simemude simunemah porak nirayohe urum galak
gure-e kemudien kemudukni daripede oya ara kekanak simunemah gagak gigike urum rancalni beden-
ne,maka ini nge barang tentu udahan mudetar rorohni tete mudenget tulakni pintu,ari kerna remalan-
ne kadang bergerdak mujangkoe kadang munyintak,mujurahe kadang lagu munulak,ini sekusawahi mien
kuama reje ma’af kire kutiro tabi kutuah bahgiente.

Ama reje,rejengku reje nge lahir kire buah hati sijantung rasa kin ules nome tawarni mata iowani rilingen
gere mugegerak iosah keroe silemut-lemut ikire awal tasak inile rupen sibergeral budak kemudin
kemudukni dari pede oya nge sawah kupitu lao,italun bange saudere urum kaum biak itosan bange
kenduri silungi lemak ibubuh kire gerale simampat italu ari kerna cacak,buge nge kaul kase mu mengen
cerak inile kire pengharapan ni ari kite selaku jema tue,nge sawah kuhat urum hinge-e ijulen kumersah
iserahan kutengku guru,kerna mununtut ilmu oyape turah kerna beta perintah ejeren agama.

Lo berganti, ulen mupinah taun berkiser, munurut penengonen pengalaman murip buah hati jantung
rasa, pepora ara sidemu dele sigere, Alhamdulillah erep nge ibetihe sikinen laut kolak taon bernenawen
sihen kire denie lues tempat berusaha.

Ama Reje… kemudien kemudukni daripede oya kerna ngemupestak pejer mubiner matani lao,iperahi
bang inih simumata, seb munengonen buah hati lagu sigerene mampat sesuk sara tapak, pejejik sara
saka,maka itunungen kire urum ringen si berberat warus siberwajib.

Kul nituah rayadi bahgie ikire beberapa lao sikukudukni benar ara rayatni kami geh berdediang
kukampung halaman niama reje tose mubalik panang aribaur ijo tersino bange kubatang ruang mubalik
panang pecengang kujungni lepo,sunguh rayatni kami gaeh berdediang berkekede mumerah biak urum
saudere,munaringen belo kire sara resek,pinang sara semir,konyel sara gecep,kapur sisara palit kin sarat
kuet tene gere ingker, kin amal tidur urum nipi jegeni ama reje beserta saudere sikami depeti.

Alhamdulillah … kemana amal tidurni siarani jema, siagih-agihe, Renye bertetah kire-e peden mupakta
kire cerite te,lahkena gere urum jema, melengkan kite we sesabi kite.

Ama Reje ….Nemah jenujung niulu kemana gerele siberet,juga gere siringentu malahan ageh-agehe
tenemeng nipumu sedemikien hale sienguk kuperin ike kebet ara sara lie, Ike ruje sisara lie benange
Putih siberbilang berupe sen angusen sekien ribu-e. Kuninge si bertimang , berupe mas mahar ….. gram
oyape besilo kite bersiselsen, ike kayu simubujur lintang berupe dipan silengkape kami rupen , ike upuh
sara salin oyape kemana sedie seala kadare.

Ama reje,….Teringet kire kite kin cerak sedenge kata pesakani muyang datu, peri mestike ari nenggeri
antara,kerna utang kata dibalas kata,edet mutubuh ukum berkalam,kemana nge du’ kuton tempate,
Ahale kite selaku jema tue ngekin tempatni kapor sesak,wajip kin penetah perlu tentu,tuh tibuk jele
kukemang sepuluh jejari besilo kutatang ken ganti nikulit manis kacu bunge lawang, kati enti ken utang
ialam baka.

Sene bubak sene bube,berakah idoyah sene itelege,seneni kekanak sawah se kusitetue ,seneni beberu
surak rupen nibebujang,sene lahni belang rupe-rupe-e ngesawah kubatang ruang,lagu peri sine sene
bubak rupen sene bube,berakah idoyah sene itelege seneni rupen ngekin bunge berakahni rupen male
kin uah,kerna detum nipungi arisijarak senge sawah, kati timul serlah ibaur simuemun, simunaso nami.
Betul penadih Ama reje,kayu rubu wani uten daling kolak kin seserenen, bengkon pepara mokot petaso
supu serule wesikona riling

Kerna tertib bermajelis umet bermulie kati angin berasal ujen berusul perbueten muasaliyah asaliyahni
perbueten,teringet kire kite kin firman Allah oya kati turah iperah ilmu agama serta sunnahni nabi.

Umpama ratip ngesara nanguk nyawa sara peluk, kulangit kubintang tujuh, kutuyuh kal pitu mata,
kuatas kire gerene turuh, kubumi gere mugempa,bulet lagu umut tirus lagu gelas, betul edet mujadi
resam,resam nge kin peraturen,beta ari jemen katiara besilo.

Ama reje… Uahni rembie beramuren,resam denie muperaturen,maman ilang maman ijo kerna ara
pudaha kati ara besilo,Ama reje, rejengku reje ngele kire kunul kite sekejep seketike mujurahan keranam
pirak batil tembege, wajib atan tempat warus barang kafat ,kemana nge bersiwewajipen kite,beta kene
kata olehte, konyel ngeirasan kelate pinange icuge ide-e, kapor ngeirasi kin apake.

Gerisni konyel ini ari batang kati semirni pinang gelah ari tampuk, apakni kapur geh ari peluk lemakni
kacu turah ari pucuk betul pedi memang ama reje, beta mulo kedah batil temiang ara kadang terkacu
gere terbunge lawang sinting batiltembege ara terpinang legih terbelo,ini makae ma’af se kutiro.

Ama reje teringet kite kin cerak pepatah sedenge keataspe bur rupe-rupe ituyuhni tapak ike renahpe
lumu ulunge kolak, luesni uten rupe-rupe roa we pintu rime-e kenarupe owe mah ari pematang sentan
ipempang roa rupe punce-e, terang tentu narunpe melengkan sara mestike-e.

Ama reje…iarapni edet kami serahan, situlu tepang sikunul semile sijeroh berbulang, engonmi renye
gelah sareh panangmi mulo gelah selese…sikat lelah-a, sikuen kiriea oya tumuk tupang cumen mantan
pejuang murebut merdeka.

Ama reje taris nume kirimen rempele nahma hujute, kerna talu munantin saut,jurah kire berjamut,
mungune bange kamini ku ama reje “ nerimemi reje kin sikami seerahni”

Alhamdulillah,…umah sipitu ruang pemulang pitu pekara betul edetni Pute merhum, ukum ari siah
kuala,sunguh edet gere penah pipet, atur enti bele, ukum enti suner, sebeb mateni ukum iowan ijtihat
mungenni edet rupen wan istanani reje.

Ucepen terimekasih kusauderengku bebewene,sekian, akhirul kalam

Assalamualaikum wr.wb.